سألت أصوات مصرية مواطنين، 24 يناير 2011 أفضل أم اليوم؟ 

• أبو أيمن 56 سنة - تاجر تحف بشارع المعز

"السياحة بترجع شوية بشوية و السوق بيمشي و اهي الدنيا بتستقر و تمشي"

•  بائع جوز هند بميدان العتبة

"يا عم انا ماليش دعوة بحاجة سيبني في حالي انا عايز اكل عيش ماليش دعوة بالسياسة ولا بفهم فيها"

• أم أميرة بائعة بطاطس مطهية بوسط البلد

"في تحسن بس مش واضح لكن التغيير الحقيقي جاي جاي ومحدش هيقدر يقف قدامه"

• عبدالعال أحمد 37 سنة تاجر ملابس بوسط البلد

"مفيش حاجة اتغيرت غير الأسعار بترتفع اكتر من الاول و الحاجة الوحيدة الي بترخص اكتر هي المواطن"

• عبد المنعم 45 سنة - سائق عربة كارو ببولاق الدكرور

"مفيش ادينا قاعدين قدامك انا وباقي السواقين مفيش شغل اصلنا بنبقي عاملين زي المراكبي ينزل يرمي شبكه والرزق على ربنا بس من ساعة التروسيكلات و التكاتك طلعت و احنا حالنا واقف"

• كريم سيد 23 سنة - سائق توك توك ببولاق الدكرور

"لقمة العيش بقت اصعب من الاول و بعدين يعني هو لو في تغيير حصل في البلد مكنش زماني لسه بسوق توك توك كان زماني لقيت شغلانة احسن بس الوضع صعب و البلد مافيهاش فلوس"

علي عبدالعليم 32 سنة - بائع خضروات ببولاق الدكرور

"مفيش حتي الآن تغيير في سياسة الحكومة في الرقابة علي الاسعار الي عمالة تغلي، لازم يبقي في ظابط و رابط في سقف، الاسعار مش بس في الخضار و الفاكهة لا في كل حاجة عشان لا الناس تتعب وتفلس ولا احنا نخسر الناس عيشتها بقت صعبه"

أميرة ندا 32 سنة - بكالوريوس تجارة و عاطلة

"تغيير اننا كسرنا حاجز الخوف و فهمنا يعني ايه فساد حقيقي مستشري في اعماق المؤسسات بمعني اصح الدولة العميقة الي رافضة اي تغيير للأوضاع للأحسن"

شهاب الدين - مصور و مخرج افلام وثائقية

"البلد بعد 25 يناير حصل فيها انفتاح في الحرية ومباشرة الحقوق السياسية لكن ابتدت تتقلص و تتراجع لصالح عودة وضع ما قبل الثورة لحد ماصبحنا في وضع اصعب و أسوء من ذي قبل"